पढ़ि-लिखि के भकुआ बने यार !

घरवाली हमते समझदार,

पढ़ि-लिखि के भकुआ बने यार !

वी घर का काम लेहेन  मूँड़े

हम बाहर घूमि-घामि आई,

मोबाइल अउ कम्पूटर ते 

जइसे हमारि भै होय सगाई !

लड़ते-झगड़ते हो गए बाइस बरस 

जब द्याखो बात सुनावैं चार 

पढ़ि-लिखि के भकुआ बने यार !

कपड़ा-लत्ता ,बरतन-चउका 

खाना-पीना ,उनके जिम्मे,

ना कहीं घूमना,बाहर खाना

पूजा, बरत निभावैं रस्में !

हमही लरिकन के गुनहगार,

पढ़ि-लिखि के भकुआ बने यार !

अब पूरे बाइस बरस बीते 

वी झेलि रहीं हमरी संगति,

'सत्ती होइ गईंन तुम्हैं साथै'

हमरी घरवाली रोजु कहति !

हमहीं यहि घर के बंटाधार ,

पढ़ि-लिखि के भकुआ बने यार !